والله ياخوى من اقعد من النوم لغاييه ما انام وانا متوتر وقلق عام عندى مصاحبه لشده اعصاب بدون سبب وعلى طول ادور لنفسى حجه امسك فيها وملاحظ نفسى وجسمى ملاحظه دقيقه اى تغير يصير اتعب واتوتر زياده بس تصدق من بعد صلاة الفجر الحمدالله يخف على وقبل لا انام اكون تمام الحمدالله

تصدق قبل كنت بنفس حالتك وتميت جذيه لمدة ثلاث سنوات خوف من الموت والامراض واختلال الانيه حيييل تعبت 00 وبعدها صارلي موقف معين وسبحان الله راح الخوف من الموت والقلق من الامراض وصار فيني رهاب اجتماعي وتوتر عام00 فا الضاهر لازم يصيرلك موقف قوي يخليك تفكر بشي ثاني بدال المرض والموت

انا ما اخاف من الموت ولا اختلال الانيه الحمدالله بس الامراض والتوتر والقلق بس قصدك موقف قوى مثل شنو يعنى

كنت بالمدرسه وصارلي موقف وضحكو علي الطلبه وربا ضارتن نافعه راح كل الخوف اللي كنت احس فيه وصارلي الرهاب الاجتماعي 00 وانا ملاحض ابو عبدالله قاعدين ندور بحلقه مفرغه نلقا لنا حل لشي يطلعنا شي جديد نفس ماصارلي وذكرتلك ماني عارف شنو اخرتها

وييييييييه انا من هالناحيه عند وجهك كل يوم اطلعلى بسالفه وخوف من شى معين يعنى عندك الحين انا اليوم وديت الوالده الطبيب تعبانه فيها الفلونزا وصخونه انت عارف هالوقت الكل فيه بس انا متخسبق وخايف حيييييييل حتى الدكتوره تقولى ماكو شى لاتخاف تقولى انا فنينى بعد الفلونزا بس الحين قاعد واحاتيها والله ومتوتر والافكار تروح وتجى فراسى

سلامتها الوالده وماشوف شر اجر وعافيه ان شاء الله
شفت خوفك كله عن المرض والله ابو عبدالله ذكرتني بنفسي قبل ترا كنت علي طول جذيه يارجال خلها علي الله

الشر مايجيك
ووالله بوعلى يعنى الى فينى طبيعى تهقا وما يادى لشى

اهي شغله نفسيه بس صح انك تحاتي وتقطع عن العالم وتحس بشد بعضلاتك 00 بس عضويا ترا مافيك شي وماراح يجيك شي بأذن الله 00 وانت مو فحصت كذا مره وجيكت علي قلبك وكذا شغله ماطلع فيهم شي لله الحمد 00 صح ابو عبوود

اى الحمدالله سويت تحاليل شامله وتخطيط قلب وانزيمات قلب كله تمام الحمد الله بس يا اخى هالتوتر والقلق شنو حله

والله يابو عبوود حله عند الله اول شي وثاني شي عند الاخصائين النفسين والدكاتره النفسيين

الله كريم انا دكتورى اليوم يوصل وبنشوف حل حق هالتوتر والقلق تصدق زاد على من سافر

ايه الجلسات العلاجيه زينه تخفف عن الواحد 00 ابو عبدالله شرايك تسأله عن حشيشة القلب يقولك هاذا كبسولات اعشاب ومروفه عند الدكاتره 00 مو نفس الادويه الي ناكلها الكيماوية الي لها اعراض 00 حشيشة القلب هاذي يقولون مالها اعراض كلش وطبيعيه بعد شرايك تسأله عنها تنفعك ولا لا

حق شنو حشيشه القلب سمعت عنها بس شنو تسوى

اهي حقة الاكتئاب وكذا واحد قريتلهم يستخدمونها يقولون خلتنا نحس بهدوء هاذا الي قريته عنها 00 انت اسال دكتورك عنها 00 وانا ادري انت خايف من الأثار الجانبيه الي تجينا اساله اذا لها اثار جانبيه( بذااات الجاهز التناسلي ) اذا ماتسبب شي جربها يمكن تنفع 00 والله ابيلك السلامه يابو عبدالله وادري الي مثل حالتنا ماله الا العلاج الا الي ربك كاتبله يشف من الامراض النفسيه

اى والله يابوعلى مالنا الا الله بس انا ما اعانى من الاكتأب صحيح تجينى فترات اكتأب بس مو على طول
بس تصدق بوعلى والله العظيم تجينى لحظات اكون تعبان وادش على اليوتيوب ولا مواقع واشوف فيدو حق مشايخ مثل عبدالمحسن الاحمد ومحمد يعقوب وغيرهم والله لما يتكلمون عن التوكل على الله ولو توكلت على الله مو بس بالكلام لا تكون متيقن ان كل شى بيد الله والله ارتاح بس احنا كلنا نقول متوكلين على الله وكل شى بيد الله بس مو مؤمنين ايمان قوى فهالموضوع لانه لو انت متاكد ان كل شى بيد الله وتتوكل على الله حق تقاته كان ماخفنا ولا حاتينا الموت ولا خوف من شى بس احنا كلام وبس مو مؤمنين حق الايمان بهالموضوع لانه اليوم سمعت حق عبدالمحسن الاحمد وتكلم عن حق التوكل على الله ووالله زرعه فينى وبعدها والله ارتحت حيييييييل وكل الخوف والتوتر راح ولله الحمد

ونعما بالله سبحانه
والله يابو عبدالله احنا مقصرين من هالناحيه بس الواحد يصلي ويحاول يتقرب من رب العالمين علي قد مايقدر وربك كريم
وانا صج اتعالج بس عندي امل اشفا بأذن الله ويمكن يجي يوم اترك الادويه النفسيه مافي شي مستحيل والحمدلله علي كل حال

امين يارب تتشافا يابوعلى وترد حياتك مثل قبل
وكل المسلمين يارب ولا يحوجنا لطبيب

امين الله كريم : وجزاك الله خير علي هالدعوه الطيبه ( :

انا بنام الحين ماتامرني بشي ابو عبدالله فبل لا اطلع من النت

ابيك سالم ياخوى تصبح على خير

وانت من اهل الخير فمان الله

السلام عليكم ورحمه الله وبركاته
شلونكم شخباركم
مسموح يابوناصر توم العافيه

هلا بوناصر يالله حياااااااااااااا
انا بخير ولله الحمد متحسن كثير انت بشرنى عنك

هلا اختى ملكه الصحه تمام ولله الحمد شكرا على سؤالج

الله يسلمج اختى ملكه الامور كل مالها وتتحسن بس باقى القلق والله كريم

انا بخير الحمد لله

امس والله كان ودي اسولف معاك ومع ابو علي

( صار له كم يوم مايجي المنتدى )

انت الحاضر الغائب يابوناصر
بس بوعلى معدل نومه عشان جذى مايدخل المنتدى

وانا بعد هلحين احاول اعدل نومي واصير انام زين


بس انت صرنا ما نشوفك الا بعد الساعة 12

حتى انا قاعد اعدل نومى تونى قاعد من النوم وكل يوم احاول اصلى صلاة وانام امس صليت العصر ونمت واليوم ان شاء الله بصلى المغرب وانام ولين مايتعدل نومى ان شاء يومين ثلاثه ويتعدل نومى باذن الله

ااااهاااا

انت نفس طريقتي في تعديل النوم اذا تلخبط نومي


ما انام مبكر , احاول انام متأخر كل يوم

اى انا ما اعرف اجبر نفسى بالنوم يالله الله كريم لانى مليت الصراحه من السهر ومليت من هالتوتر ياخوى والله قاعد اكلمك ومتوتر وشده اعضاب مادرى شنو حلها لاحول ولا قوه الا بالله

بعد اذنكم ياجماعه انا بطلع لانى احس انى زهقان بروح اللربع
اشوفكم على خير