حل سحري لمعضم المشاكل النفسيه ووصفه للسعاده والراحه النفسيه
 

السلام عليكم ورحمة الله ...

هذا الموضوع مهم جدا جدا جدا ... قصة نجاح غير متوقع وخيالي الله يديمه علي ويعافي الجميع من اي مشكله يواجهونها ... انا شخص مر بمعانات طويله امتدت لما يقارب الست سنين ... الادويه كانت ملجا مهم بالنسبه لي متى ما حسيت اني وصلت الى مرحله لا تطاق ولا اقدر اتحملها .... اعترف اني ما قد كملت اي كورس مع الاسف لاكن هذا الشي كان نتيجة الاعراض المزعجه اللي كانت توقف بطريقي

الموضوع زي ما قلت غايه بالاهميه وانا توصلت له بعد معاناه وبحث وقراءه في الكتب والابحاث الطبيه ... كوني طالب في كلية الطب فكانت المصادر الموثوقه كثيره ومجال البحث فيها واسع ...

طيب وش هي مشكلتي ... معاناتي الاساسيه هي مع الرهاب الاجتماعي لاكن الحل هذا يناسب الكثير من الامراض النفسيه وهي احد اهم الطرق اللي يتبعها الدكاتره النفسيين في معالجة مرضاهم ...

في فتره من الفترات وصلت لمرحله اني احاول تجنب الجميع لاني كنت اواجه صعوبه بالكلام وتركيب الجمل ...فكنت دائما اتكلم واحس اني طفل توه يتعلم اللغه العربيه ...هذي المرحله وصلت لها بعد فتره طويله من التطور التدريجي للمرض ...فالمراحل بدت من خوف في التجمعات الكبير وبعدها الامامه وبعدها الكلام مع بعض الاشخاص وصولا الى الحاله اللي تكلمت عنها

وبعد فتره طويله من الدعاء للتوصل الى حل دلني ربي (وله الحمد والشكر) الى احد مواقع الابحاث الطبيه المعتمده والموثوقه ...فبحثت عن افضل علاج للرهاب الاجتماعي بناء على نتائج الابحاث المثبته بالارقام ... فوجدت ان العلاج اللي فعاليته تزيد على فعاليت الادويه والعلاج اللي يعتبر اول خطوه علاجيه يجب على المعالج النفسي القيام بها هي العلاج السلوكي المعرفي ... فبحثت بعدها فالمواقع عن هذا العلاج ووجدت ملف تورنت لطبيب نفسي مؤسس لمركز علاجي لمرضى الرهاب الاجتماعي ....هذا الملف يحتوي على مقاطع صوتيه وكانك جالس معاه وهو قاعد يعالجك

النقطه الاساسيه والعمود الاساسي لهذا العلاج هو في طرد الافكار السلبيه بشكل كامل .... سمعت انا بالسابق كثير عن التفكير الايجابي وحسيت اني احاول اعطي نفسي امل لاكن بالعاده اواجه صعوبه في تحويل الافكار السلبيه ...لاكن هذا الدكتور تركيزه في قتل الافكار السلبيه وعدم محاولت التفسير او مناقشة الفكره داخل راسك لان هذا الموضوع صعب نسبيا

الحجر الاساس وطريقة تمرين عقلك هي كالتالي ....
النقطه الاهممممممممم انه متى ما جتك فكره سلبيه تحاول انك بشكل مباشر تمسحها من مخك وتحاول تشغل نفسك ... ممكن ترجع لك خمس او عشر مرات ورى بعض وانت ما عليك الى بالاستمرار .. خلك اعبط من هالفكره ...في البدايه الموضوع بيبين وكانه من المستحيل لاكن والله واسال مجرب ولا تسال خبير ان الاستمرار على محاربة الافكار والاصرار على التخلص منها بيوصلك لنتايج خياليه غالبيتنا لم يجدها بالعلاج الدوائي ... متى ما جت الفكره اطردها واشغل نفسك ....ونقطه مهمه ايضا ومساعده على تطبيق النقطه الاولى هي باضافة جمله مثل " بس هالافكار ما يجي منها الا الظرر ، او خلاص لازم اوقف هالافكار او غيرها..." وقلها بصوت تسمعه متى ما جتك فكره سلبيه وكان الوضع حقك يسمح بانك تقولها بصوت مسموع ...لانك اذا سمعتها العقل يحلل الامر بشكل اكبر من مجرد التفكير به في عقلك الباطن .... مع مرور الوقت بتقل هذي الافكار بشكل كبير وبيصير ملاحظتك لهالافكار اول ما تجي وطردك لها يصير اكثر عفويه ولا يحتاج التكلف اللي في بداية المشوار .. الى ان تصل لمرحله باذن الله يكون مخك ياس ولا يرسل مثل هذي الافكار بشكل نهائى ... ويا جماعت الخير هذي نتائج من واقع تجربه ويدعمها نتائج الابحاث الطبيه فنصيحه ان الواحد يحاول يتمسك بهالشي ويطبقه بدون ياس لفتره لا تقل عن الاسبوعين ...وباذن الله بتلقى نتايج تحمد الله سبحانه عليها

نقطه اخيره ... الكثير من الناس مع الاسف متى ما جاهم الحل على طبق من ذهب بدون لا يسعون ويجتهدون وراه ...لا يجدون الحرص على الالتزام بالعاده ويقولن ان الموضوع يستاهل " تجربه " ولا يعطونه الاصرار الحقيقي اللي يحتاج له .... فاتمنى من الجميع الجديه ومجاهدة النفس وستجد باذن الله نتيجه ترضيك وتسرك


اسم الدكتور اللي يتكلم بالمقاطع اللي تكلمت عنها في موضوعي هو Dr. Thomas A. Richards ... اللي لغته الانجليزيه ممتازه بيستفيد من كلامه ... واللي لغته مش ولا بد فانا انصحه بالدكاتره النفسيين والواحد يتخوف من الروحه لهم لاسباب تافهه ويستمر في المعاناه لمده طوييييله جدا بينما الحل قد يكون بين يديه ...

وفي الختام اتمنى منكم الدعاء الصادق في ظهر الغيب واتمنى ان يفرج الله عني وعنكم وعن المسلمين كل كرب انه هو المجيب الرحيم

الله يجزاك خير على الدعاء والمشاعر الطيبه

زي ما قلت لك اخوي الاصرار والتمسك هو الاساس ... وكل ما جت الفكره وانت جالس في مكان وما حولك احد حاول انك تستخدم جمله معينه وكانك تسكت هالافكار ... لانك في حال سماعك لمثل هذي الجمل فالعقل يحللها بشكل اكبر ويتعامل معها بجديه اكثر ... ولا ننسى موضوع الانشغال المباشر باي موضوع يشتت انتباهنا عن مثل هالافكار ...فاول ما تجيك الفكره حاول اولا طردها ولا تحاول انك تناقشها بالمنطق (مثل انك تقعد تسال نفسك وش سبب المشكله وتاخذ وتعطي معها ... لانك في الاخير عادتا بتشعر بالياس لان الافكار بتستمر بالعوده ) ... لاكن اذا كل مره تجاهلتها واشغلت نفسك ...مع الوقت بيصير التجاهل اسهل عليك وعدد الافكار السلبيه يقل وتبدا تعيش حياه طبيعيه ... من طرق اشغال النفس مثل ما يقول الدكتور انك تحاول تغني اغنيه ( بحكم اننا مسلمين والحمد لله حاول انك تشغل نفسك بترتيل ايات من القران ) ...لان مثل هذي الافعال جيده لاشغال المخ عن مثل هالافكار السلبيه ... وحاول انك تلاحظ ازالتك لهالفكره وتفرح بكل مره وتستشعر انك قاعد تمشي على الطريق الصحيح ....
وطبعا ما لا ننساه هو الدعاء لان اعانة الله سبحانه هي ما يسهل كل عسير ... والسلام عليكم ورحمة الله

ويا جماعت الخير الدكاتره النفسيين والاستمرار معهم وتطبيق ما يقولون باذن الله بيكون له اثر كبير على حالتك ... انا اتكلم عن العلاج السلوكي المعرفي وليس العلاج الدوائي ... لان اذا تغيرت الافكار فالعلاج نهائي باذن الله واتمنى من الجميع ان يعطي الدكاتره فرصه وحده على الاقل ويجرب ... وباذن الله انه بيطمئن بان زيارتهم هي الطريق الامثل للعلاج ... والنفس تتعب كما يتعب البدن فمثل ما نروح لدكاتره لعلاج الابدان فعلينا بالدكاتره اللي يعالجون مشاكلنا النفسيه ...والله يدل الجميع على ما فيه خير