ملخص يومي
 

ملخص اليوم
قعدت من النوم ساعه 12 ضهر وتغديت
وطلعت من البيت رحت الجمعيه شريت اغراض للمزرعه وديت الهندي الطبيب مريض
الحين قاعد على البحر صارلي ساعتين مركب سماعات واهوجس ساعه 5بروح دوانيه ولد خالتي بقعد عنده ل ساعه 10 وبرجع البيت
انتم اللحين تقولين اني مرتاح لا بالعكس جابر نفسي على الطلعه ونفسيتي صفر بس بتعامل مع المرض كا طفل ولازم والطفل لازم تجبره ماتطاوعه

المداومه على الخروج ينفع احيانا في الاكتئاب وتسهل المهمه كلما زاد تواجدك بالخارج الا اذا اتت النوبه ( الكريهه )

احسنت والى الامام يا صديقي

ما شاء الله أحييك نظامك حلو الله يحفظك
انت الان بتساعد نفسك و بتحاول ربنا ما يضيع لك تعب و يقويك و يعافيك

بعد ما قرأت موضوعك عرفت إني انا المكتئب مو انت ههههههههههههه

معلش بالاول تجبر نفسك على الخروج ،،

مع الوقت رح تصير عادة و يصير الخروج أسهل ..

واصل اخي ..

اللهم امين ويحفظج ل هلج ول حبابج

اي والله صدقت كل شي ب تعود

ههههههه ماشاء الله عليك مافيك الا العافيه انا حالتي حاله خلها على ربك بس غاصب نفسي على الطلعه

النوبه الله يعيني عليها ي انها بتولاني 😂😂

الله يشفيك ويشفينا

بصراحة... شي طبيعي بتكتئب دام برنامجك جذي
الشي الوحيد الايجابي بالبرنامج هو الطلعة

اما النوم للظهر هو اكثر شي يخسف المزاج ويجيب اكتئاب
ع قولة النشيدة: "نام بكير وفيق بكير شوف الصحة كيف بتصير"
الصحة الجسمية والنفسية كلها تصير أحسن
لان اذا البرنامج مقلوب الاحاسيس اوتوماتيك تصير مقلوبة لان في خلل


نظامك يحتاج لبعض التغييرات.. مثلا:
1. تنام الليل وتصحى الفجر

2. لا تنام بين الطلوعين والافضل تقسم وقتك فيها
قراءة قران+ اذكار+ مشي في الهواء الطلق
لان في مشايخ على مستوى عالي من الروحانية
ينصحون بالمشي في الخارج هالوقت
وهالشي اثبتوه دكاترة ومتخصصين في مجال الصحة النفسية
ان له تاثير ايجابي كبير على معنويات الانسان
ومعروف ان اللي ينام بين الطلوعين ينام عن رزقه لان في هذا الوقت تتوزع الارزاق

3. الاستغفار 70 مرة بعد صلاة العصر + 70 مرة بعد منتصف الليل لها اثر كبير في الرزق المعنوي والمادي

4. تشغل نفسك بدراسة او وظيفة هالشي وايد يساعد على الثقة بالنفس ومع الاختلاط بالناس يقل التفكير
وتحس ان عندك هدف قاعد تنجز وتتعلم وتتطور

5. باقي اليوم طلعات ترفه عن نفسك و يا حبذا لو كانت الطلعة فيها صلة رحم
حبسة البيت هي اللي تجيب الاكتئاب والوسواس

6. تخصص وقت للرياضة بالممشى او الحديقة اذا ما تقدر تمشي الصبح

7. تغير نظامك الغذائي تخليه صحي والافضل نباتي
لان الاكل له تاثير اكبر مما نتصور ع النفسية
بعض انواع الاكل مثل السكريات تسبب ادمان واكتئاب وامراض نفسية وجسدية لا حصر لها

8. تخلي لك هواية مثلا قراءة كتب/ تربية طيور او دجاج/ تصوير/ تصميم جرافيكي/ زراعة نباتات الزينة

9. تدخل دورات في مجال التنمية البشرية او أي دورات تساعدك تطور من نفسك

10. صلاة الليل لها اثر كبير في تقرب الانسان من الله ولها اثار ما يعلمها الا الله من الناحية الدينية والدنيوية
وسبق وشفت تجربة شخص قام يصلي الليل ويلح في الطلب من الله يعلمه شنو اللي خلاه ينتكس ويمر بحالة الاكتئاب
عقبها شاف حلم يشير لذنب كان يسويه وجاه العقاب في الدنيا منها تاب لله واستغفر من ذنبه وطلع من هاي الحالة بفضل الله والتوكل عليه

11. انك تخلي لك اوراد
مثلا الصلاة على النبي 100 مرة باليوم
لا حول ولا قوة الا بالله 100 مرة
حسبي الله ونعم الوكيل 100 مرة
مو شرط تسويهم كلهم بنفس اليوم
تقدر توزع كل يوم شي
ولا شرط تفضي نفسك عشان تقولهم، لان هاي مستحبة في اي وضعية وحتى لو كنت مشغول بايدك تقدر ترددهم بلسانك

12.تكرار سورة الانشراح والضحى
في ناس جربوهم واستفادوا، واصلا بمجرد تكرارهم يعطي طاقة ايجابية وأمل بالله ويخلي الواحد يتفاءل
وحتى استخدام التوكيدات الايجابية وايد مهم لانها تخاطب العقل الباطن مع الوقت راح يستوعبها وتحل بديل عن الافكار السلبية

13. تشرب اعشاب تهدئ الاعصاب وترفع المعنويات مثل شاي البابونج او شاي النعناع أو حتى في بعض الاكلات مثل بذر الكتان

مو شرط تطبق هالاشياء كلها، ع الاقل بعضها..
مع الاستمرار ابصم لك مليون بالمية بتطلع من هذا الوضع وبترجع لوضعك الطبيعي أو شبه طبيعي على الاقل

عدنا z5

حبيت اضيف نقطة
بخصوص الاستغفار لازم ما يكون لقلقة لسان
يكون جاد وان تعاهد نفسك وتعاهد الله انك تقلع عن كل الذنوب في حياتك
مرة قريت ان بعض الذنوب مهما سوى الانسان ما يقدر يكفرها
وما تكفرها غير المصايب !!
فالافضل ان نستغفر الله أول بأول.. عشان ما يبقى علينا شي
في عبارة قرأتها "ان القلوب لتصدأ كما يصدأ النحاس"
فالمواظبة على الاستغفار تجنبنا الوصول لمرحلة اللي ذكرهم الله بالقران "كلا بل ران على قلوبهم ما كانوا يكسبون"
طبعا الكلام ما اوجهه لك بشكل شخصي وإنما أوجهه حق نفسي قبل لا اوجهه لك وهذا واجب علينا جميعا

** قراءة سورة البقرة بشكل يومي
في ناس يقدرون يختمونها بيوم واحد
بس بصراحة احس الشي صعب، انت اقرا اللي تقدر عليه ولا تكلف نفسك فوق طاقتها
يعني اذا ما تقدر تختمها كل يوم قسمها على 3 ايام او 5 ايام مثلا
في حديث للنبي (ص) قرأته من خلال المنتدى عن سورة البقرة "اخذها بركة وتركها حسرة"
+ تشغيلها بصوت جميل اثناء النوم

** انك ترقي نفسك بين فترة والثانية
او ع الاقل تسمع الرقية بالهيدفون، وتحصن نفسك وبيتك
لان بعض الامراض النفسية اصلها بالاساس امراض روحية

** تكثر من الصدقة والدعاء لان هالشيئين من اكثر الاشياء اللي تدفع البلاء
وترضي امك وابوك وتطلب منهم يدعون لك، وتطلب الدعاء من اصدقاءك واهلك المؤمنين والمشايخ

** تروح العمرة، فيها روحانية عجييية
وتروح المساجد قد ما تقدر لان بعد فيها روحانية

** تكثر من القعدة بالحدايق والبحر وتتأمل الطبيعة وهذا لمسته من برنامجك اليوم
الاستمرار على هذا الشي فعلا له تاثير ايجابي على النفسية

** العمل الخيري يعطي الانسان طاقة ايجابية رهيبة، لان الانسان منغلق يعيش همومه فقط
لكن العمل الخيري يخليه ينظر لأفق أوسع، وينظر للمصلحة الجماعية ويحس انه يعطي... وسعادة العطاء تفوق سعادة الاخذ

** من أهم النقاط ان اذا جت ع بالك فكرة سلبية مباشرة تقوم وتشغل نفسك باي شي ثاني عشان ما تكبر وتسيطر عليها بدال ما تسترسل فيها وتتحول لاكتئاب

** السفر ليه دور كبير في نسيان الهموم
عن الإمام علي (ع):
تغرب عن الأوطان في طلب العلى
وسافر ففي الأسفار خمس فوائد
تفريج هم واكتساب معيـــشة
وعلـــم وآداب وصحـــــبة ماجد.

** تغير روتينك.. مو بس الحين..
الانسان يحتاج تغيير روتين بين فترة والثانية
لان الروتين والجمود من اكثر الاشياء اللي تجيب الاكتئاب
مو بس الروتين
حتى اثاث غرفتك او بيتك تحتاج تسوي rotation
تبديل اماكن الاشياء يجدد الطاقة عن تجربة
ودايما حط نباتات زينة وورود وزينة مو شرط تقتصر الزينة على مناسبات الفرح
خل لك اي شي لما تطالعه تحس بالبهجة وكثر من البخور والروايح الطيبة وسماع الموسيقى
ترى كل حاسة من حواس الانسان تحتاج شي يبهجها

** تتبع اساليب التفريغ العاطفي
مثلا اذا متضايق من شي تكتب هذا الشي اللي مضايقنك في ورقة وعقب تحرقها
او تشققها "تمزقها" وتقطها في البحر
/
وفي بعد طريقة سمعتها من د. احمد عمارة يقول الشركات العالمية يحطون تماثيل
للمدراء بالشغل والموظفين وقت اللي يغضبون على مدير يجون يحطون ضرب في تمثاله
حتى انهم شافوا اكثر تمثال يتعرض للضرب راحوا كلموا هذا المدير اللي على شكله
وخلوه يعدل اسلوبه في التعامل مع الموظفين
عموما فكرة التمثال اللي الواحد يطيح فيه ضرب لما يعصب من اهم اساليب التفريغ العاطفي
/
او انك تتخيل احد يسمعك وتفضفض له بصوت مسموع.. قريت ان الرجال يميلون لهاي الخطوة لما يقعدون صوب البحر
/
بالنسبة لي اذا اشوت كورة احس هالشي يخفف غضبي احيانا.. ممكن كرة القدم تعتبر تنفيس مشاعر بالنسبة للرجال

** انك تلاعب الاطفال لانهم يعطون طاقة ايجابية كبيرة.. تقدر مثلا تجمع اطفال عايلتكم توديهم حديقة او صالة العاب
أو انكم تلعبون العاب جماعية او تقول ليهم قصص.. المهم انك تتعامل مع الاطفال لانهم ملائكة بعدهم أنقياء.. قلوبهم نظيفة
بعد هي ما لوثتها الدنيا

** انك تتبع نظام تنظف جسمك من السموم، حمية الديتوكس تحت اشراف اخصائي تغذية
وهاي الخطوة مهمة جدا قبل تعديل برنامجك الغذائي عشان تحس فعلا بالتغيير
لان جزء كبير من المشاكل النفسية اللي نمر فيها سببها المعدة بسبب اللي تحويه من سموم
فضلات اكل ما تخلصنا منها او حتى بالرئتين من استنشاق الدخان واشياء وايد حولنا تشكل خطر على صحتنا النفسية والعقلية والجسمية

** اذا كنت ما تهتم بفتح الدرايش "النوافذ" بالغرفة، احرص على فتحهم بشكل يومي ساعتين عالاقل
مرت فترة ع طول دوخة وخمول ومزاجي كل متعكر تالي انتبهت ان الدريشة ما افتحها فما يتهوى المكان وهذا السبب
من وقتها صرت افتح الدريشة عالاقل ساعتين باليوم منها صرت احسن

** في فكرة سمعتها من سها عيد اخصائية الفنغ شوي ان نحط ملح خشن نوزعه في زوايا الغرفة الاربعة
وكل 3 ايام نرمي هاي القطع في المرحاض ونسحب السيفون ونحط قطع ملح خشن جديدة مكانها
لان الملح الخشن يمتص الطاقة السلبية بس لازم ما نتركه اكثر من 3 ايام عشان ما ينعكس مفعوله من ايجابي لسلبي
والسيفون احسن مكان عشان ما تنتشر الطاقة السلبية عقب ما يمتصها

** خصص لك يومين او 3 ايام بالاسبوع تسبح في البحر وتمشي ع الساحل حافي.. عشان تطلع الطاقة السلبية اللي في جسمك

** راجع اخصائي نفسي ثقة عشان يعطيك علاج سلوكي يساعدك تجتاز هاي الحالة وكتشجيع لك نفس الوقت

في صفحات حبيت اذكرها بتساعدك انك تغير نفسيتك للاحسن
ع اليوتيوب:
محمد نجم الدين mohamed nadjmo
شخص مر بأزمة نفسية وما استفاد من الأدوية النفسية
من خلال القراءة في مجال الصحة النفسية والصحة الغذائية قدر يغير حياته كلها
خصوصا برنامجه الغذائي وأدخل الرياضة لبرنامج حياته وقدر يتخطى الازمة اللي مر فيها

د. علياء المؤيد
اخصائية تغذية ناس وايد استفادوا من برامجها
سواء في الصحة الجسدية او الصحة النفسية
وتغيرت حياتهم للاحسن

د. أحمد عمارة
دكتور في علم الطاقة، محاضراته كلها تعطي شحنات ايجابية
دكتور فعلا مثقف ومطلع والحلو انه يجيب معلومات ويربطها بالدين
وكلامه دايما معزز بأمثلة توضيحية
استفدت منه نقاط مهمة وايد
من بينها ان الانسان المتشائم مشكلته ان ما يتوكل على الله حق التوكل
لازم نوكل امورنا لله يتولى زمام امورنا ونترك التفكير بالمستقبل
ولفت انتباهي لان الاشياء اللي رافضينها بحياتنا هي اللي تتم لاصقة
بحياتنا، والاشياء اللي خايفين منها هي اللي تصير
لان حنا نجذب الشي اللي نفكر فيه
واشياء وايد.. محاضراته كلش هامة ومشوقة

-------
منتديات الشيخ عبدالله الخليفة برامجهم حلوة وقبل سنوات اتبعت برنامجهم لفترة بسيطة وحصل تغيير جذري بحياتي

-------
في كتب بعد حلوة تخفف من الوضع مثل
كتاب دع القلق وابدأ الحياة - لـ ديل كارنيجي
تلاقيه موجود ع الانترنت

في كتاب قريت فيه من ايام كلش حلو
اسمه
60 نصيحة
لتنظيف الجسم من السموم
لـ ماري بوريل
شركة دار الفراشة للطباعة والنشر
متنوع بين تنظيف الجسم نفسه من خلال الصوم او الاعشاب مثلا
وفيه اشياء خارجية مثل التدليك وحمام السونا
وفيه نصايح نفسيه، مثلا ما نجبر نفسنا ع شي حنا ما نحبه مجرد عشان نرضي الناس
نخلص نفسنا من الضغوط اول بأول.. نتبع الاسترخاء.. ما نقارن نفسنا بأحد لان هالشي يسبب الشعور بالدونية

هالكتاب كلش حلو ومن أحلى الكتب اللي قريتها في حياتي
والغريب ان سعره بس دينار واحد.. هضيمة في حقه بصراحة

في كتاب قريته من سنوات بعد حبيته وايد استفدت منه
اسمه أسرار العلاج بالصوم
لـ صوفي لاكوست
بعد تبع دار الفراشة للنشر
وناوية اعيد قراءته عقب ما عرفت ان الصحة النفسية جدا مترابطة مع نظامنا الغذائي

في كتب وايد حلوة ومهمة وممكن تسوي تغييرات بحياتنا
مثلا في اعضاء يقولون عن كتاب السيطرة على الافكار والمشاعر
وكتاب البرمجة اللغوية العصبية لابراهيم الفقي
كل ما نطلع اكثر في هالمجال كل ما تزيد فرصتنا على تجاوز الأزمة

الله يشفى جميع مرضى المسلمين