نفساني - عرض مشاركة واحدة

05-09-2017, 01:47 AM

عدنا

حبيت اضيف نقطة
بخصوص الاستغفار لازم ما يكون لقلقة لسان
يكون جاد وان تعاهد نفسك وتعاهد الله انك تقلع عن كل الذنوب في حياتك
مرة قريت ان بعض الذنوب مهما سوى الانسان ما يقدر يكفرها
وما تكفرها غير المصايب !!
فالافضل ان نستغفر الله أول بأول.. عشان ما يبقى علينا شي
في عبارة قرأتها "ان القلوب لتصدأ كما يصدأ النحاس"
فالمواظبة على الاستغفار تجنبنا الوصول لمرحلة اللي ذكرهم الله بالقران "كلا بل ران على قلوبهم ما كانوا يكسبون"
طبعا الكلام ما اوجهه لك بشكل شخصي وإنما أوجهه حق نفسي قبل لا اوجهه لك وهذا واجب علينا جميعا

** قراءة سورة البقرة بشكل يومي
في ناس يقدرون يختمونها بيوم واحد
بس بصراحة احس الشي صعب، انت اقرا اللي تقدر عليه ولا تكلف نفسك فوق طاقتها
يعني اذا ما تقدر تختمها كل يوم قسمها على 3 ايام او 5 ايام مثلا
في حديث للنبي (ص) قرأته من خلال المنتدى عن سورة البقرة "اخذها بركة وتركها حسرة"
+ تشغيلها بصوت جميل اثناء النوم

** انك ترقي نفسك بين فترة والثانية
او ع الاقل تسمع الرقية بالهيدفون، وتحصن نفسك وبيتك
لان بعض الامراض النفسية اصلها بالاساس امراض روحية

** تكثر من الصدقة والدعاء لان هالشيئين من اكثر الاشياء اللي تدفع البلاء
وترضي امك وابوك وتطلب منهم يدعون لك، وتطلب الدعاء من اصدقاءك واهلك المؤمنين والمشايخ

** تروح العمرة، فيها روحانية عجييية
وتروح المساجد قد ما تقدر لان بعد فيها روحانية

** تكثر من القعدة بالحدايق والبحر وتتأمل الطبيعة وهذا لمسته من برنامجك اليوم
الاستمرار على هذا الشي فعلا له تاثير ايجابي على النفسية

** العمل الخيري يعطي الانسان طاقة ايجابية رهيبة، لان الانسان منغلق يعيش همومه فقط
لكن العمل الخيري يخليه ينظر لأفق أوسع، وينظر للمصلحة الجماعية ويحس انه يعطي... وسعادة العطاء تفوق سعادة الاخذ

** من أهم النقاط ان اذا جت ع بالك فكرة سلبية مباشرة تقوم وتشغل نفسك باي شي ثاني عشان ما تكبر وتسيطر عليها بدال ما تسترسل فيها وتتحول لاكتئاب

** السفر ليه دور كبير في نسيان الهموم
عن الإمام علي (ع):
تغرب عن الأوطان في طلب العلى
وسافر ففي الأسفار خمس فوائد
تفريج هم واكتساب معيـــشة
وعلـــم وآداب وصحـــــبة ماجد.

** تغير روتينك.. مو بس الحين..
الانسان يحتاج تغيير روتين بين فترة والثانية
لان الروتين والجمود من اكثر الاشياء اللي تجيب الاكتئاب
مو بس الروتين
حتى اثاث غرفتك او بيتك تحتاج تسوي rotation
تبديل اماكن الاشياء يجدد الطاقة عن تجربة
ودايما حط نباتات زينة وورود وزينة مو شرط تقتصر الزينة على مناسبات الفرح
خل لك اي شي لما تطالعه تحس بالبهجة وكثر من البخور والروايح الطيبة وسماع الموسيقى
ترى كل حاسة من حواس الانسان تحتاج شي يبهجها

** تتبع اساليب التفريغ العاطفي
مثلا اذا متضايق من شي تكتب هذا الشي اللي مضايقنك في ورقة وعقب تحرقها
او تشققها "تمزقها" وتقطها في البحر
/
وفي بعد طريقة سمعتها من د. احمد عمارة يقول الشركات العالمية يحطون تماثيل
للمدراء بالشغل والموظفين وقت اللي يغضبون على مدير يجون يحطون ضرب في تمثاله
حتى انهم شافوا اكثر تمثال يتعرض للضرب راحوا كلموا هذا المدير اللي على شكله
وخلوه يعدل اسلوبه في التعامل مع الموظفين
عموما فكرة التمثال اللي الواحد يطيح فيه ضرب لما يعصب من اهم اساليب التفريغ العاطفي
/
او انك تتخيل احد يسمعك وتفضفض له بصوت مسموع.. قريت ان الرجال يميلون لهاي الخطوة لما يقعدون صوب البحر
/
بالنسبة لي اذا اشوت كورة احس هالشي يخفف غضبي احيانا.. ممكن كرة القدم تعتبر تنفيس مشاعر بالنسبة للرجال

** انك تلاعب الاطفال لانهم يعطون طاقة ايجابية كبيرة.. تقدر مثلا تجمع اطفال عايلتكم توديهم حديقة او صالة العاب
أو انكم تلعبون العاب جماعية او تقول ليهم قصص.. المهم انك تتعامل مع الاطفال لانهم ملائكة بعدهم أنقياء.. قلوبهم نظيفة
بعد هي ما لوثتها الدنيا

** انك تتبع نظام تنظف جسمك من السموم، حمية الديتوكس تحت اشراف اخصائي تغذية
وهاي الخطوة مهمة جدا قبل تعديل برنامجك الغذائي عشان تحس فعلا بالتغيير
لان جزء كبير من المشاكل النفسية اللي نمر فيها سببها المعدة بسبب اللي تحويه من سموم
فضلات اكل ما تخلصنا منها او حتى بالرئتين من استنشاق الدخان واشياء وايد حولنا تشكل خطر على صحتنا النفسية والعقلية والجسمية

** اذا كنت ما تهتم بفتح الدرايش "النوافذ" بالغرفة، احرص على فتحهم بشكل يومي ساعتين عالاقل
مرت فترة ع طول دوخة وخمول ومزاجي كل متعكر تالي انتبهت ان الدريشة ما افتحها فما يتهوى المكان وهذا السبب
من وقتها صرت افتح الدريشة عالاقل ساعتين باليوم منها صرت احسن

** في فكرة سمعتها من سها عيد اخصائية الفنغ شوي ان نحط ملح خشن نوزعه في زوايا الغرفة الاربعة
وكل 3 ايام نرمي هاي القطع في المرحاض ونسحب السيفون ونحط قطع ملح خشن جديدة مكانها
لان الملح الخشن يمتص الطاقة السلبية بس لازم ما نتركه اكثر من 3 ايام عشان ما ينعكس مفعوله من ايجابي لسلبي
والسيفون احسن مكان عشان ما تنتشر الطاقة السلبية عقب ما يمتصها

** خصص لك يومين او 3 ايام بالاسبوع تسبح في البحر وتمشي ع الساحل حافي.. عشان تطلع الطاقة السلبية اللي في جسمك

** راجع اخصائي نفسي ثقة عشان يعطيك علاج سلوكي يساعدك تجتاز هاي الحالة وكتشجيع لك نفس الوقت

بدون خطه معجب بهذا