المشاركة الأصلية كتبت بواسطة عيون متفائلة

السلام عليكم ورحمة الله وبركاته

حياك الله اخونا الشهيد

ربي يرزقنا وياك الشهادة في سبيلة و نسعد بنوالها و لو متنا على فرشنا

حيث قال صلى الله عليه وسلم من سأل الله الشهادة بصدق نالها و لو مات على فراشه

و اشكرك على المعلومات القيمة اللي ذكرتها بخصوص الدواء و بخصوص الغذاء

اما بالنسبة للخبطة جدول الاكل في رمضان تدري اني من ثالث رمضان في عالم ثاني بسبب حالتي
و غذائي عبارة عن بيض او شابورة او بسكوت او زبادي

اخر عهدي بالطبخ ثاني يوم برمضان

بعدها لاني قادرة اطبخ و لا أحفل بشي

بالنسبة يوم انك تقول الفافرين أقصى حد للنوم ١٥ ساعة
اجل ما تبعد عن العشرين

انا مع اني ما تجاوزت للان ربع حبة يعني قوتها ٢٥ ملجم الا اني ما زلت دايخة اترنح طوال اليوم و نومي فقط ما يتعدى الثلاث ساعات كيف لو ابزود الجرعة و الله المستعان

و ذاك السيروكويل اخذت ربع حبة اول يوم بعدها ما طالعت فيه


عوذة يخلي الواحد يعيش في دوامة دوار طوال الوقت طول ما انت صاحي حتى صلاة مدري كم صليت

وش الفايدة ؟ يا نومة محترمة ما بين ٦ إلى ٧ ساعات يا بلاش، اما طول الوقت طايحة دوخة و زغللة و لا أقدر أقف على حيلي خمس دقايق وش الدبرة

لكن الحمد لله على كل حال

المشاركة الأصلية كتبت بواسطة عيون متفائلة

راجعة لك حبيبتي يا وجه الخير بشيء من التفصيل

بالنسبة للوالدة الله يعافيها اليوم الصباح أجرت العملية و ما زالت منومة ، اليوم بعد ما فاقت من البنج صابتها حالة غريبة قعدت تصارخ و تقول يا الله طلعيني من هنا عشان ما يقتلونا تراهم بيذبحوني و يذبحونك و جلست تتفلت عليهم بالسب لين ربطوها بالسرير و قامت تصارخ زيادة عيونها طايرة كلها هلع و انا احاول أهديها
عيونها المرعوبة قطعت قلبي خفت صابها فصام زي اخوي الله يعافيه
طولت و هي على ذي الحالة ما بين الساعتين و الثلاث ساعات شالت المستشفى بصراخها ، المشكلة ما تصرخ من الألم تصرخ من الرعب ، حرفيا مرعوبة عمري ما شفتها بذي الحالة و ما تبي اقفل باب الغرفة و شوي تطالع بالستارة تقول شوفيه شوفيه يبي يقتلنا و انا عشان اطمنها اقلها يمة هذي الممرضة مو واحد مع ان مافي احد ، قالت متأكدة انها الممرضة قلت ايه زي اللي تطمنت شوي و صدقتني
اللي خوفني انها تشوف اللي ما نشوف

قلت للطبيبة اللي اجرت العملية هل هذا طبيعي قالت ايه بعد البنج ، بس هي وقتها فاقت من فترة و خلاص صارت واعية .. احس الطبيبة تقول كذا عشان فقط تطمني

دعواتك لها حبيبتي مرة خايفة عليها ، مدري أباري الجراحة و الا حالتها ، المشكلة انها جراحة ماهي منظار

ربي يطمني عليها و يطمنك على غواليك يا غالية