تجرتي مع الوسواس ونوبات الذعر

تجرتي مع الوسواس ونوبات الذعر

بسم الله الرحمن الرحيم
والصلاة والسلام على أشرف الأنبياء والمرسلين
سيدنا محمد وعلى آله وصحبه أجمعين ..أما بعد

أرجو من الله توفيقي بكتابة هذا الموضوع والذي أتحدث فيه عن بعض تجاربي العلاجيه السلوكيه والمعرفيه

وأدعوا الله أن تكون سبب في راحتكم ولو قليل

نبدأ
طبعآ نعلم كلنا ان الوسواس هوالوسواس القهري هو نوع من التفكير -غير المعقول وغير المفيد- الذي يلازم المريض دائما ويحتل جزءا من الوعى والشعور مع اقتناع المريض بسخافة هذا التفكير مثل تكرار الوضوء تكرار اقفال الابواب وتكرار غسل الايدي من باب النظافه ووووووو هذا فعل قهري
والوسواس التفكيري
مثل التفكير بدنو الاجل والموت او ايذاء النفس او عمل شيء غير طبيعي او الوسواس منن انه عند القيام بفعل كذا سوف يحصل لي كذا ووووووو .... الخ

لما تجيك فكرة انك سوف تموت الان او انه سوف يحدث لك مكروه او او او -يبدأ الشعور بالقلق ويبدأ بنقل الافكار للحساسات الموجوده بجسمك وتبدأ بنقل الافكار الخاطئه للدماغ -ومن ثم يدرك الدماغ ماتنقله الحساسات ويبدا عندك الكتمه والخوف وخفقان بالقلب وتوتر وعدم استقرار وضيق بالنفس وبرود الاطراف وتبدأ فيك ضيقه وتزيد الافكار وتبدأ تدور بشكل دائري وترجع مره ثانيه وتسوي خلل بالحساسات وهكذا ....وبعد وقت تشوفها اركدت وهدت امورك ..طيب الحساسات سبحان الله تستقبل جميع الاشياء اللي تجيها سواء مزيفه او حقيقيه
مثل ضابط المباحث اللي عنده مخبرين يجيبون له معلومات ويبدا هو بالتحقيق فاتلاقي المعلومات الصحيحه تفيده وتكون فعلا موجوده بالشخص اللي بلغوا عنه
واللي تطلع غير صحيحه يتلاشها وينسى امرها ولايختم لها لانها غير صحيحه كذب
وهكذا الحساسات تستقبل الفكره الوسواسيه وتحللها بالجسم وترسلها للدماغ وتجيك خفقان وهيك امور
بس لما تروح للدكتور يقولك والله ياخي نبضك طبيعي وجسمك حرارته طبيعيه ومافيك الا العافيه وراح يقولك هذا شي نفسي من ضغوط الحياه
لكن لما تحس مثلا بكحه الكحه شي فعلي واضح او ارجاع للاكل من معدتك او او تروح للدكتولر يقولك انت فيك نزلة برد او ماكل شي غلط او نايم قدام مكيف او تغيير جو وموجود عند كل الناس
طيب اللي نقل هالمعلوةمات داخلك هو الحساسات وتترجمت بمخك وبانت فعلا على شكل اشياء واقعيه لانها فعلا موجوده

يعني سبحان الله الحساسات عندنا تنقل اي شيء سواء حقيقي او وهمي
وهاذي نعمه من ربنا سبحانه وتعالى حتى يكون الجسد بكامل المؤازره والاستعداد

فعن النبي صلى الله عليه وسلم أنه قال:

(( مَثَلُ المؤمنين في تَوَادِّهم وتراحُمهم وتعاطُفهم: مثلُ الجسد، إِذا اشتكى منه عضو: تَدَاعَى له سائرُ الجسد بالسَّهَرِ والحُمِّى ))

نوبات الهلع
هي حاله تجي عند بعض الاشخاص حيث يكون سببها انك قلقان بشكل دائم او متوتر او تجيك افكار وسواسيه بشكل دايم مثل الخوف من جميع الاشياء اللي ذكرتها سابقا والخوف السفر بعيد او بالطائرات اووو والخ
فيصير عندك خوف شديد وتوجس يصل ذروته واعلى شيء عنده هو (الخفقان ,شعور بالغثيان , الصداع , زغلله بالعيون وعدم الرؤيه جيدآ, التنميل بالجسم , الرعشه , ويبدأ الواحد يفسرها انها امراض واني سوف اموت الان واني ماقدر اتحكم بنفسي واني راح انجن وهكذا .

وبسبب عدم المعرفه لطبيعة اللي يجيك شيء طبيعي انها راح تخليك تدور بحلقه مفرغه ووهميه وليس لها اي صحه -واكبر دليل انها جتك اكثر من مره ولو صار فيك شيء ولا سويت بنفسك شيء ولله الحمد وبس اقصى شيء تسويه فيك هذه الاعراض هي الدوخه بعد ماتروح عنك الفكره والخمول وضيقه بس , واتحداكم انتوا اللي تقولون بيصير شيء انه صار فيكم شيء واللي يقول أذي نفسي انه يقدر يسوي شيء بنفسه ياشيخه لو اعطيك ابره وانت بعز حالة الذعر والوسواس واقول انغزها بجسمك ماراح تقدر لانك عارف انها بس افكار بس اذا جيت للتطبيق سبحان الله عندك المشاعر الواعيه متجهزه وتوعيك ان هذا غلط اللي تسويه ويكون بعلمك ان هالمشاعر الواعيه اقوى بكثير من المشاعر اللاواعيه .
طبعا شيء ماتعرفونه اغلبكم ان نوبات الذعر اسبابها وراثيه او اختلال بافراز بعض المواد الكيميائيه بالدماغ وايضا وهذا مهم الله لايبلانا يارب استخدام المخدرات او الكحول او كميات كبيره جدا من استخدام القهوة التي تحتوي على الكافيين ,وكذلك تصاحب بعض الاحيان امراض عضويه مثل فقر الدم اظطراب الغده الدرقيه او نقص فيتامين د .

عموما افضل علاج لجميع ماذكرته وحسب تجربتي ولله الحمد 1//
جلسات العلاج النفسي وخصوصآ العلاج المعرفي السلوكي حيث يتم فيه تصحيح جميع المفاهيم الخاطئة لديك وتدريبك على التغلب على الضغوط النفسيه والاجتماعيه وتمارين الإسترخاء.
2//العلاج الدوائي وانتم عارفين هالشيء.

طبعا بعض القواعد التي لازم تعرفها عندما تأتيك نوبة الذعر
1//تذكر أن الاعراض والافكار والاحاسيس التي تحي بها ليست سوى ردة فعل لجسمك بسبب بعض الضغوط بالحياه بشكل عام والضغوط النفسيه والتفكير الكثير .
2//هذا اهم شيء تعرفه هو انه ان هذه الاعراض ليست مؤذيه وليست خطيره ولكنها مزعجه بس ولن تتطور مهما حدث يعني اسواء واقوى شيء تسويه فيك هو الخفقان والغثيان والامور اللي ذكرتها فوق بس .
3//توقف عن التفكير المرعب والمخيف ولاتضيف افكار وخرابيط زياده عن اللي انت فيه يعني مثلا مو تقول اذا دخلت الحمام الله يكرمكم راح يصير فيني كذا واكيد اذا صار راح اموت , لانه اصلا ماراح يصير شيء يعني مجرد تزيد على الفاضي فطنش .
4//ركز باللي يصير بجسمك وقت النوبه من تعرق وخفقان ولاتفكر باي شيء ثاني عشان ماتزيد الفكره .
5//انتظر الخوف اللي يجيك والهلع والفكره وعطها راحتها وخلها تفلها الين تطلع اللي بخاطرها وتمشي لاتهرب منها ولاتحاربها لانها فكره مزيفه وشيء غير واقعي يعني ماينفع نحارب شيء مو موجود اصلا مثل اللي يضرب الهواء .
6// لاحظ انه بعد ماتتوقف عن اضافه اي افكار وقت النوبه راح تشوف الخوف يتلاشى تدريجي .
7//الفقره السابعه ياشباب هذا يعتبر تمرين تتعلم فيه كيف تسيطر على الفكره والمشاعر بشكل هاديء جدا ومريح وراح تلاحظ كيف تبدأ تقوى عزيمتك وتضعف هالفكره .
8//فكر بايجابيات بجياتك بشيء حلو تذكرته بشيء حلو راح تسويه فكر بالراحه اللي راح تحصلها لو تغلبت على هذا الشيء الفارغ .


بعد مانطبق بعض النقاط اللي ذكرتها فوق

توقع انه يحدث لك بعض المخاوف لاتهتم لها وكمل طريقك بايجابيات

اي مكان صار فيه نوبه او موقف او وقت ابقى فيه ولاتهرب منه خلك موجود وخلها تجيك مره ومرتين وثلاث واربع
الين تروح بعدها فكر وقول انا اللحين انتظرتها وجتني اكثر من مره بس ماصار معي الشيء اللي انا خايف منه معناتها بس خرابيط وشيء فاضي
كذا انت هزمتها بشكل غير مباشر

مثلا تخاف من الخروج من البيت
جرب اطلع لوحدك راح تجيك شيء طبيعي لانك عطيتها وجه وراح يجيك خوف وترجع للبيت بسرعه
مافي مشكله تراك سويت شيء ايجابي وقوي ارجع مره ثانيه وسوها
راح تلاحظ انها تخف معك مع التكرار وتشوفها اختفت نهائي بس اصبر وكرر العمليه الين هي تمل منك من كثر ماجربت وتبعد عنك وتكون وقتها انت الرابح .

اذا جتك الاعراض تبع الخوف والخفقان وهكذا تجاهلها اشغل نفسك بشيء ثاني العب بجوالك -امشي -سوي رياضه -سوي تمارين استرخاء وهكذا سوي اي شيء يلفت انتباهك-
ويكون بعلمك التنفس الاسترخائي من اقوى المقاومات للنوبات -ادخل على يوتيوب واكتب تمارين الاسترخاء وابيك تبدا من اليوم تطبقها باليوم ثلاث مرات ولاتوقفها الين ماترتاح مو شرط تجربها اسبوع وتقول مارتحت وتوقف لا
جرب وكمل وتاكد ان طريقك صح بس يبيله صبر وطولة بال .
واهم شيء كل مره تقاوم فيها ابيك تسجلها بورقه وقلم
وتكتب كل شيء صار معك وشلون كان قوته وشنو سويت وابيك تقاومها باللي ذكرناه فوق
مو تقاومها بالذهاب للمستشفى او الاستسلام باكل المهدئات او تسوي اللي تبيه هي لا
قاومها واكتب كل يوم -ومجرد واجهتها راح ترجع للورقه اللي كتبتها وتشوف نجاحاتك وتشوف كيف هي صارت ضعيفه مع الوقت وكيف انك قدرت تهجدها وتهزمها مع انها غير حقيقيه بس عشان اوصل لك الفكره والطريقه .

فكر بالمده اللي كانت تجيك فيها وكانت تخليك تفكر وتقول راح يصير فيني كذا وكذا وهي بالاخير ماسوت فيك ولا شيء ولاصار فيك ولا شيء ولله الحمد وهذا انت طبيعي .

يعني هي عباره عن مشاعر مزيفه لاتغني ولاتسمن من جوع .

استقبها اذا جتك واعتبرها صديقه لك ولاتهتم فيها واعرف انه سواء شعرت بها او ماشعرت فيها تراها كلها نفس الشيء والله يعني راحت ولا جت عادي بس تضايقك شوي لانك عطيتها وجه واكبر من حجمها .
وتذكر بالاول والاخير انها
اتت من خلال بعض ضغوط الحياه وبعض المشاكل والمسؤوليات واجتمعت براسك وبدأ المخ بتفريغها عن طريق افكار وخوف وهكذا -وبالعكس هذا شيء حلو
لانه لو اجتمعت براسك وضغطت ع نفسك ولاتفرغت هالاشياء ممكن لاسمح الله يصيبك سكر او ضغط وهذا الشيء فعلا وليس مبالغه

ففعلا احمد ربك على هالنعمه اللي تفرغ الضغوطات من دماغك وتخليك ترتاح ولايصير فيك مرض عضوي لاسمح الله -عيش حياتك بايجابياتها فكر بيومك تفائلوا -واذا جتك قول لها هلا والله تعالي فرغي اللي عندي احس اني تعبان تعالي احسن مايصير فيني ضغط او سكر تعالي تكفين وهكذا .هذا اللي قدرت عليه وانشاءالله لنا المزيد من التجارب اللي راح اذكرها باذن الله

المصدر: نفساني

بارك الله فيك اخي على الكتابه المفيده
وانا مع العلاج السلوكي المعرفي بيعطي طاقه واعاده برمجه للدماغ
في انتظار المزيد منك
دمت في حفظ الرحمن

صدقتي اختي ساره
والله يحفظ جميع المسلمين

وتشرفت بمرورك

ياعسي يوم العافيه قدامك

وان شاءالله نطبق ماكتبتي

تحيتي لك

انا لااعاني من خفقان ولا تنميل ولا بروده فقط احساس قوي بقرب الاجل وخوووووف فهل هو وسواس ام ماذا شعور حقيقي

وسواس وليس شعور حقيقي الله يسعدك ويطول بعمرك

طرح جدا جميل

جزاك الله خيرر