نفساني - قصيدة قوية لطلال الرشيد ،،،عاهدت شعري على العزة وصنت العهـد

طــــــــلال الــرشـــيـــد

عاهدت شعري على العزة وصنت العهد

فـلا مدحـت الملـوك ولا هجيـت العبيـد

رفعت شعـري عـن العالـم رفعتـه صعـد

لين ارتقـى هامـة الغيـم القصـي البعيـد

على بسـاط النـدى بيـده عصـاة الرعـد

يومّي بها للمطـر ويجيـب حلـو القصيـد

والبارحة مجلسـه رووس المـزون وسجـد

غـزّ البيـارق يحسبنّـه بمـجـده وحـيـد

الغيم تحته وناظـر فـوق مـا شـاف احـد

إلا هكـا الطاهـر الحـرّ المـلاك الفـريـد

هو من يكون الذي مـا بعـده الا الصمـد !؟

ردت نجوم السمـا : هـذا طـلال الرشيـد

ما تعرفه !؟ وانطوى مـزن وتطايـر بـرد

قلت اعرفه واعرف انـي لـو جهلتـه بليـد

أي السناعيس ما ينكـر وهـو فـى المهـد

وشلون يخفى الذي نوره طوى كـل بيـد ؟!

هـذا الأميـر الأميـر ابـن الأميـر وبعـد

أبو الأميـر وبعـد سيّـد علـى كـل سيْـد

رجلـه وطـت هامـة الدنيـا وكفـه عقـد

حبل ٍ مسد قـاد بـه مهـر الزمـان العنيـد

هذا الذي في الصحيح مْـن المراجـل ورد :

إنكـار قـدره مـن افعـال الذليـل الشريـد

في حضرته تحلف ان الضـيّ يملـك جسـد

وبغيبتـه تـدرك الوحشـة بكلـمـة فقـيـد

بسـام ثغـره وسيـع ٍ صـدره بْـلا جهـد

و " بلا جهد تفـرق السيـد عـن المستسيـد

أرحم مـن السلـم مادامـت تجـي بالجلـد

واقسى من الظلم لاصـارت بفـل ّ الحديـد

له قلب ٍ اسطـا مـن الحـرّ بنهـار الهـدد

واعذب من الغيمة اللي صبحهـا يـوم عيـد

غزيـر جـوده يعدونـه ولا لــه عــدد

في كـل يـوم يتبيـن مـن قديمـه جديـد

اليا غضب ما حـرم محتاجـه مـن المـدد

وليا رضى مـا رحـم عـدوه مـن الوقيـد

قلب ٍ سطا ما نشـد قلـب عطـا مـا نشـد

واقلبه اللي معه يمشـي علـى مـا يريـد !

إيه اعرفـه يـا مصابيـح السمـا واعتقـد

لو طال عمره كثيـر مـن الرواسـي تبيـد

واحلف برب ٍ رفع سبـع السمـا بـلا عمـد

لليـوم ذكـرى رحيلـه غصـة ٍ بالـوريـد

فـلا نسينـاه ابـد فقـده تـقـل يستـجـد

ولا سليناه ابد لو قيل يكتب شهيد